Massimiliano Allegri foli për “Juve TV” në prag të ndeshjes me Barcelonën, në “Camp Nou”, e vlefshme për trofeun Gamper. Trajneri nga Livorno theksoi se bardhezinjtë e kanë marrë me shumë seriozitet, edhe pse është më shumë një miqësore luksi,
“Do të jetë një ndeshje e shkëlqyeshme mes dy klubeve të mëdha, pasi Juve i trajton të gjitha ndeshjet me seriozitet. Një ndeshje e veçantë që ngre nivelin e vëmendjes dhe na bën të përgatitemi mirë për sezonin.
Do të më ndihmojë të shoh gjendjen e ekipit dhe lojtarëve. Çfarë do të doja të shihja? Topin, kur nuk e kemi dhe rritjen e disa lojtarëve.”.
Allegri tha se të gjithë lojtarët në dispozicion do të kenë hapësirë ndaj Barcelonës, përveç Dybalas:
“Preferova t’i jepja më shumë kohë në stërvitje, pasi do të kishte qenë rrezik ta merrnim për këtë ndeshje. Fola me Paulon dhe vendosëm që është më mirë që ai të qëndrojë këtu. Ne duhet të punojmë.
Puna ime është të vazhdoj atë që më la Pirlo dhe të përpiqem të përmirësoj atë që gjeta. Për ta bërë këtë dhe për të arritur objektivat e muajit maj duhet sakrificë dhe dëshirë, kjo është ADN -ja e Juves dhe përmes kësaj do të arrijmë rezultatet. Rolet janë pak a shumë të përcaktuara, por unë kam disa kuriozitete, dua të shoh nëse disa lojtarë mund të luajnë në role të caktuara”.
