Interi do të kërkojë të vijojë ecurinë e rezultateve pozitive në kampionat.
Kampionët zikaltër do të zbresin në fushë në orën 12:30, ku do të përballen në transfertë ndaj Sampdorias, në sfidën e vlefshme për javën e 3-të të Serisë A.
Statistikat janë në favor të interistëve që kanë fituar shtatë nga tetë ndeshjet e fundit të Serisë A kundër Sampdorias: humbja e tyre e vetme erdhi në ndeshjen e janarit të kaluar që u mbyll me shifrat 2-1 .
Ndërkohë për sa i përket formacionit zyrtar, trajneri Inzagi, ka vendosur t’i mbetet besnik titullarëve të ndeshjes së fundit ndaj Veronës, teksa i vetmi ndryshim është aktivizimi i Di Markos nga minuta e parë, i cili do të formojë treshen e mbrojtjes me De Vraj dhe Shkrinjar, në mungesë të Bastonit.
Në krahun tjetër Sampdoria, kundërpërgjigjet me një dyshe veterane në majën e sulmit, bëhet fjalë për Kuajarela-Kaputo.
