Bayern Munih mund të shesë yllin Robert Lewandowski për të financuar një lëvizje për Erling Haaland mes pasigurisë për të ardhmen e polakit në klub, sipas raporteve në Gjermani.
Kontrata e Lewandowskit me Bayern skadon në vitin 2023 dhe ai po kërkon një marrëveshje të re.
Por klubi thuhet se heziton të zgjasë marrëveshjen e 33-vjeçarit dhe nëse ata nuk arrijnë të përmbushin kërkesat e tij dhe agjentit Pini Zahavi, atëherë një lëvizje verore për Haaland mund të jetë në tryezë.
Humbja e sulmuesit të tyre, i cili përfundoi i dyti pas Lionel Messit për Topin e Artë këtë vit, do të ishte një goditje e madhe për skuadrën e Bundesligës, me atë që ka shënuar 29 gola në të gjitha garat e deritanishme këtë sezon.
Por largimi i Lewandowskit mund të hapë derën për një transferim të madh.
Haaland pritet të jetë në lëvizje gjatë verës, kur klauzola e tij e lirimit prej 64 milionë £ të hyjë në fuqi.
21-vjeçari ka tërhequr elitën me paraqitjet e tij, duke shënuar 17 herë në 14 paraqitje këtë sezon. Ai ka 74 gola në 73 ndeshje për Dortmundin në total.
Bayern beson se mund ta shesë Lewandowski për rreth 60 milionë euro (51 milionë funte) gjatë verës, gjë që do t’i ndihmojë ata të mbledhin fonde për Haaland, sipas ‘BILD’.
Javën e kaluar, agjenti i sulmuesit norvegjez, Mino Raiola, zbuloi se ka një ‘shans të madh’ që njeriu i tij të largohet nga Dortmundi, duke renditur Manchester City, Real Madrid, Bayern Munich dhe Barcelona si destinacione të mundshme.
Lewandowski raportohet se po shikon një kalim në Real Madrid, duke i thënë agjentit të tij Zahavi se një kalim te gjigantët spanjollë duhet të konsiderohet ‘prioritet’.
