Trajneri i Ipswich Town, Kieran McKenna pret që sulmuesi Bersant Celina të qëndrojë me ekipin gjatë ndeshjeve të kombëtareve të javës së ardhshme, pavarësisht se Kosova ka dy miqësore, kundër Burkina Fasos dhe Zvicrës.
McKenna thotë se Celina ka folur me Federatën e Futbollit të Kosovës dhe ka shprehur dëshirën e tij të qëndrojë në Suffolk, siç bëri gjatë ndeshjeve ndërkombëtare të nëntorit, për ndeshjen në shtëpi kundër kundërshtarëve të tjerë të play-off-it, Plymouth.
“Mendoj se ai ka pasur disa biseda me ta dhe unë kam kuptuar se Bersanti ka pasur njëfarë komunikimi me federatën dhe e bëri të qartë se ai me të vërtetë dëshiron të qëndrojë javën e ardhshme dhe dëshiron të përfshihet në disa ndeshje të rëndësishme që ne kemi”, tha trajneri i klubit.
“Siç e kuptoj unë, ai do të qëndrojë me ne dhe do të jetë i disponueshëm gjatë dy javëve të ardhshme”.
McKenna është një fans i madh i 25-vjeçarit të huazuar nga Dijoni, të cilin e njeh prej disa kohësh. “Më ka pëlqyer shumë të punoj me të, ai është një lojtar që e kam njohur që nga koha e tij si lojtar i ri në Manchester City, nga luajtja kundër tij fillimisht kur unë isha në Tottenham kur ai ishte ndoshta 16 ose 17 vjeç dhe sapo kishte ardhur nga Norvegjia”.
