Marselo Brozoviç është i pazëvendësueshëm për Inzagin dhe kjo është provuar tashmë disa herë. Pikërisht për këtë fakt, tek Interi objektivi madhor i merkatos së verës është të gjejë një rezervë të denjë për kroatin, që të ofrojë siguri në mesfushë.
Leandro Paredes, argjentinasi i PSG-së e Zhordan Veretu, francezi i Romës, janë profilet që më së shumti u pëlqejnë drejtuesve zikaltër, të cilët nuk e kanë ndalur me kaq kërkimin e tyre.
Në radhë janë Morten Hjulmand i Leçes që ofron siguri dhe vizion, po ashtu si mesfushori i Marsejës Bubakar Kamara e Gonzalo Vijar, spanjolli i Romës i huazuar aktualisht te Getafe.
Në fund, listës prej 6 emrave për të zëvendësuar Brozoviçin i shtohet Lusien Agume, francezi që është në pronësi të Interit dhe i huazuar te Bresti ka bërë një sezon të mirë, aq sa ka bindur zikaltrit ta kthejnë në bazë.
