Futbollisti Granit Xhaka ka shtatë vite që është pjesë e Arsenalit.
Pas një kohe të vështirë me tifozët, tani gjërat janë duke u përmirësuar.
Ai ka folur për sezonin e ardhshëm në faqen e klubit.
Granit Xhaka e nis sezonin e tij të shtatë me Arsenalin. 29-vjeçari tani është anëtari më jetëgjatë i “Topçinjve”.
Ka një gjë që ai nuk ka arritur të bëjë me klubin ndër vite: kualifikimin në Champions League. Kjo e shqetëson jashtëzakonisht shumë.
Arsenali e humbi për pak objektivin sezonin e kaluar. “Ne kishim gjithçka në duart tona.
Kështu që në fund ishim shumë të zhgënjyer. Por nuk mund ta ndryshojmë më”, thotë Xhaka në një intervistë për faqen e klubit.
Xhaka aktualisht ndodhet në SHBA me Arsenalin në përgatitje për kampionatin e ri. "Është shumë nxehtë. Nuk është e lehtë të punosh kështu, por ne bëjmë më të mirën. Skuadra është mirë. Për momentin jam shumë i kënaqur”, u bën të ditur ai tifozëve.
Sezoni i ri në Premier League fillon më 5 gusht, Arsenali takohet me Crystal Palacen (21:00). Me një moshë mesatare prej 24.6 vjeç, Topçinjtë janë aktualisht skuadra më e re në ligë.
Megjithatë, Xhaka është i bindur se objektivat mund të arrihen në sezonin e ri. Konkretisht, londinezët e veriut duan të kualifikohen sërish në Champions League.
Xhaka është plot energji. Ka të bëjë edhe me nënshkrimet e Gabriel Jesus (nga Manchester City) dhe Fabio Vieira (nga Porto).
“Ata po përshtaten në mënyrë të përkryer në ekip dhe tashmë po bëjnë një punë të shkëlqyer”. Integrimi i lojtarëve të rinj është si një enigmë. “Sigurisht që duhet cilësi, por nëse nuk i përshtatet skuadrës, është shumë e vështirë të arrish diçka”, thotë kapiteni i Kombëtares së Zvicrës.
Edhe me tifozët duket se është sërish në rrugën e duhur. “Ndjej qartë më shumë dashuri. Detyra ime është t'u jap diçka atyre në fushë”.
Ai i sheh si vendimtare fjalët e tij në “The Players Tribune” dhe golin e tij vendimtar në ndeshjen kundër Manchester United (3:1) në muajin prill.
Në fund të bisedës, Xhaka flet edhe për Botërorin e ardhshëm me Zvicrën.
“Për momentin nuk jam duke menduar për Kupën e Botës në Katar. Fakti që po zhvillohet për herë të parë në dimër është diçka shumë e veçantë. Por ka edhe katër muaj për të shkuar”.
