Klubi i Lokomotiva Zagreb edhe në këtë sezon do të nisë kampionatin me objektiv sigurimin e pjesëmarrjes në kompeticionet ndërkombëtare.
Skuadra e cila ka në gjirin e saj shumë futbollistë shqiptare, 6 të tillë të ndarë mes titullarëve dhe atyre në stol në duelin e sotëm, ka fituar me shifrat 2:1 me përmbysje përballë një pretendenti tjetër për Europën, Osijekut.
Në duelin ku Mersinaj dhe Çokaj e nisnin titullarë me Kallakun, Tucin, Salihun dhe Smakajn të cilët ishin në pankinë, ekipi mik kaloi i pari në avantazh me anë të Klainheisler në minutën e 16.
Por Lokomotiva dominoi ndeshjen dhe kërkoi me ngulm golat të cilët erdhën vetëm në minutat e fundit me Boshkoviç, në minutat 80 dhe 86.
I pari ishte falë një goditje këndi të harkuar saktësisht nga Çokaj, i cili gjeti shokun e skuadrës në zonë dhe ai dërgoi sferën në rrjetë.
Ndërsa në të dytin, ishte Tuci ai i cili nisi aksionin sulmues për skuadrën e tij e cila mori tre pikët e para në këtë kampionat.
