Këtë fundjave ngre siparin Kategoria Superiore për sezonin 2022-2023 me sfidën Kukësi – Tirana, që do të luhet në “Kukës Arena”.
Klubi verilindor kërkon ta shndërrojë në festë me praninë e një numri të madh tifozësh vendës. Kukësi ka njoftuar se topin e parë për këtë sfidë hapëse do ta shkelmojë Pëllumb Kërxhaliu, një ish-futbollist i skuadrës verilindore.
Ish-kapiteni i Kukësit në vitet ’70-’80 do të jetë pjesë e ceremonisë hapëse të Superiores, teksa edhe FSHF ka planifikuar një ceremoni për fillimin e kampionatit.
Në këtë mënyrë, klubi i Kukësit fton të gjithë fëmijët e moshës 10-14 vjeç, që të jenë të pranishëm në stadium, duke nisur nga ora 14:00.
Fëmijët do të jenë pjesë e ceremonisë hapëse dhe nga Federata dhe do të ketë dhurata simbolike për ta.
U bëhet thirrje prindërve që ditën e premte të shoqërojnë fëmijët e tyre në stadium, për të festuar së bashku fillimin e kampionatit.
