Në prag të “El Clasico” mes Real Madridit dhe Barçës, që do të luhet të dielën prej orës 16:15 në “Santiago Bernabéu”, Xavi Hernández foli në një konferencë për shtyp. I vetëdijshëm për rëndësinë e ndeshjes, aq më tepër pas rezultatit të arritur në Ligën e Kampionëve ndaj Interit, trajneri blaugrana ka shpjeguar si vijon: “Nuk mund ta shkatërrojmë projektin përnjëherë”.
Nga ana tjetër, ai ka theksuar në disa raste: “Në nivel projekti jemi shumë herët. Jemi në ndërtim dhe tani nuk mund të shkatërrojmë gjithçka menjëherë. Produkti në Champions është trishtues, por mendoj se jemi në rrugën e duhur”.
Duke e ditur se rezultati në Champions League nuk është pozitiv, ai theksoi se ka edhe më shumë gara: “Ka kompeticione të tjera, po zhvillojmë një kampionat të shkëlqyer në La Liga. Kemi shënuar 20 gola dhe kemi pësuar vetëm një. Jemi liderë. Llogaritë duhet bërë gjithmonë në fund”.
Joan Laporta tashmë deklaroi të premten në “Barça TV” se kishte besim total te trajneri. Këtë e ka konfirmuar edhe Xavi: “Me presidentin nuk kemi folur asnjëherë për vazhdimësinë time. Le të punojmë. Sezoni vazhdon”.
Disa fjalë mbi debatin e stilit të lojës së Barcelonës: “Duhen më shumë muskuj, veç truve. Brishtësia emocionale e skuadrës sonë? Unë nuk mendoj kështu. Me një bllokim mendor nuk do ta kishim barazuar ndeshjen ndaj Interit dy herë. Skuadra besoi deri në fund dhe kishte respekt për veten.
I shoh lojtarët e mi të përfshirë, me shpirt dhe guxim. Fitorja nuk erdhi për shkak të rrethanave të ndryshme, është e vështirë të shpjegohet. Nuk kemi konkurruar mirë në kohën e duhur. Ndjesitë në Evropë në krahasim me sezonin e kaluar janë shumë më të mira. Mundohem të mbajmë gjithmonë gjërat pozitive”.
Një “El Clasico” pa kapitenët e Barçës: “Mund të jetë. Do të shohim se çfarë do të ndodhë. Ka ndodhur tashmë këtë sezon. Unë nuk i shikoj këto gjëra. Gjithçka fokusohet te kapitenët, por ne jemi një ekip. Të gjithë lojtarët janë të rëndësishëm, jo vetëm ata që luajnë nga fillimi. Futbolli ka ndryshuar, janë pesë zëvendësime dhe të gjithë duhet të jenë gati”.
Si do të bllokohet Benzema: “Ne do të ndryshojmë pak. Nuk kemi Ronald (Araujo), i cili e ndaloi Vinicius shumë mirë vitin e kaluar. Kushdo që luan në krahun e djathtë duhet të jetë shumë i mirë dhe të ketë ndihmën e të tjerëve. Vitin e kaluar, Araujo kishte nevojë edhe për mbulim nga shokët e skuadrës. Sidoqoftë, unë insistoj: Më shumë se Vinicius, ai që më shqetëson është loja në bllok e Real Madridit”.
Zhgënjimi i tifozëve të Barcelonës: “I kuptoj në mënyrë të përsosur. E di ku jam. Kemi dështuar, kur nuk duhej ta bënim. Unë kam ndjeshmëri dhe e kuptoj tifozin e Barçës. Jam gjithashtu i trishtuar, ajo që ndodhi një ditë më parë ishte një turp i tmerrshëm. Por ne nuk do të ndalojmë.
Kam ardhur këtu më pak se një vit më parë për të ndryshuar situatën dhe jam optimist. Kemi bërë nënshkrime të mira, mendoj se është herët për të nxjerrë përfundime. Ka mbetur shumë; La Liga, Kupa e Mbretit, Superkupa, le të shohim si përfundon Champions League… Të shohim”.
