Mbrojtësi i djathtë brazilian, Dani Alves është nën hetim për sulmin seksual të dyshuar ndaj një gruaje në një klub nate në Spanjë muajin e kaluar, njoftoi të martën Gjykata e Lartë Katalanase.
Në një njoftim për shtyp nga gjykata në Barcelonë, thuhet se procedura është hapur “për shkak të kallëzimit të paraqitur nga një grua për një sulm seksual të dyshuar që ndodhi në një klub nate në Barcelonë muajin e kaluar”.
Deklarata nuk përmend emrin e Alves në mënyrë specifike, por një zëdhënëse e gjykatës konfirmoi për Reuters se ai është subjekt i raportit. Ajo tha se rasti është në hetim, por gjykata nuk ka më shumë informacion.
Mediat spanjolle raportuan se gruaja akuzoi Alves se e kishte prekur nën të brendshme pa pëlqimin e saj, ndërsa ajo ishte me miqtë në një klub nate në fund të dhjetorit 2022.
Zëdhënësi i Alves tha se lojtari “i mohon me forcë” të gjitha akuzat. Alves është aktualisht në Meksikë dhe luan për Pumas UNAM.
Alves u bë braziliani më i vjetër që luajti në një ndeshje të Kupës së Botës kur luajti kundër Kamerunit në Kupën e Botës në Katar.
