Mungesa e vëllezërve Gjelbrim dhe Shqiprim Taipi në stërvitjen e sotme të Kukësit, ka bërë që të lindin dyshime nëse të dy do të vazhdojnë të jenë pjesë e klubit verilindor. Por pas publikimit të lajmit për këtë mungesë, ka ardhur edhe reagimi i verilindorëve.
Këta të fundit insistojnë se të dy vëllezërit janë pjesë e projektit të klubit dhe do të vazhdojnë të jenë pjesë e tij, duke mbajtur një peshë të rëndësishme për të.
"Kukësi hedh poshtë lajmet e publikuara ditën e sotme në median e shkruar, aty ku aludohet për largimin e kapitenit Gjelbrim Taipi dhe mesfushorit Shqiprim Taipi. Klubi i Kukësit përgënjeshtron këto lajme të rreme dhe informon tifozët dhe median e shkruar se Gjelbrim Taipi dhe Shqiprimi Taipi janë dhe do të mbeten pjesë e ekipit tonë.
Klubi i Kukësit i bën thirrje të gjitha mediave, të shkruara dhe vizive që të tregohen më të kujdesshëm në shkrimin e lajmeve të rreme dhe së pari, të tregohen profesionistë.
Klubi i Kukësit ka qenë i hapur për mediat për çfarëdo lloj informacioni dhe në këtë mënyrë kërkon të konfirmojnë informacionet para se të publikojnë gjëra jo të vërteta", reagon Kukësi.
