Erling Braut Haland nuk resht së çudituri me fanellën e Mançester Sitit, në një sezon të parë që është i denjë për të përfunduar nëpër kopertina.
Në suksesin 4-1 ndaj Sauthemptonit në fundjavë, sulmuesi norvegjez e dërgoi në 30 numrin e golave të tij në Premier Ligë, por mbi të gjitha shënoi edhe golin numër 200 në karrierën e tij në 244 ndeshje të luajtura.
Janë shifra përbindëshi për “pykën” e “qytetarëve”, i cili e arrin një shifër të tillë përpara atyre që kanë dominuar futbollin gjatë dy dekadave të fundit, Lionel Messit (në moshën 22-vjeçare kishte shënuar “vetëm” 120 gola) dhe Kristiano Ronaldos (85 gola).
Dyqind gola, shifër e pabesueshme për futbollistin norvegjez të lindur në Lids në vitin 2000 dhe që në Mançester ka shënuar 44 gola këtë sezon në të gjitha kompeticionet.
Përveç këtyre, me kampionët e Anglisë, janë edhe 20 me klubin norvegjez të Moldes, 29 me austriakët e Salcburgut dhe 86 me gjermanët e Borusias së Dortmundit. Dhe këtyre u shtohen edhe 21 golat me fanellën e kombëtares norvegjeze.
Në histori, ai është lojtari i gjashtë më i ri që arrin 200 golat pas Pelesë, Ronaldo Nazarios, Ferenc Pushkashit, Euzebios dhe Nejmarit. Ka shënuar me kokë, me të djathtën, të majtën madje edhe në akrobaci (siç ishte goli i tij i dytë të shtunën kundër Sauthemptonit).
Repertori i norvegjezit është i pasur dhe i plotësuar. Dhe me dopietën kundër “shenjtorëve”, janë 30 gola në vetëm 27 ndeshje këtë kampionat.
Numrin më të lartë të golave gjatë një sezoni të Premier Ligës e mban Mohamed Salah me 32 (2017-’18). Por ende me nëntë ndeshje në dispozicion, Halandi kërkon të bëjë pluhur dhe hi rekordin e egjiptianit dhe jo vetëm të yllit të Liverpulit.
Tashmë ai është vetëm 5 gola larg rekordit historik të Endi Kolit (1993-’94) dhe Alan Shirerit (1994-’95), 34 gola gjatë një sezoni në Premier Ligë, por atëherë sezoni nuk kishte 38 javë, por 42.
I pyetur pas fitores nëse tashmë Haland është në nivelin e Kristiano Ronaldos dhe Mesit, trajneri Pep Guardiola u përgjigj: “Për sa i përket shënimit të golave, ai është shumë i ngjashëm me Kristianon, por Messi është lojtar më i kompletuar.
Messi mund të luajë kudo, ndërsa Kristiano dhe Erling janë më shumë makineri. Erling e di që këta djem dominuan mbi dy dekada jo vetëm një apo dy sezone, duke fituar tituj dhe bërë gjithçka”.
