Reali i Madridit pësoi një humbje befasuese ndaj Girona me rezultatin 4:2, duke shtangur mbarë opinionin sportiv.
Skuadra e Carlo Ancelotti shfaqi probleme të shumta, kryesisht në repartin difensiv, teksa kjo gjë u pohua edhe nga vetë trajneri italian, që në prononcimin e dhënë pas ndeshjes, nuk e ka fshehur zhgënjimin për rezultatin duke deklaruar:
“Është e vështirë të humbasësh kështu! Loja ka qenë e keqe në mbrojtje dhe ky ka qenë çelësi.
Skuadra nuk luajti sot. Ishte një standard shumë i ulët në të gjitha kuptimet.
Ekipi ishte nervoz.
Vinicius Junior bëri mirë në nivel individual, ai shënoi një gol dhe dha një asist, por merr shumë kartona të verdhë.
U përpoqëm të përmbysnim rezultatin individualisht. Niveli individual gjithashtu ishte nën atë normal, por jo vetëm për dikë, për të gjithë. Niveli ishte shumë i ulët.
Në shtatë ndeshjet e fundit kemi mbajtur rrjetën të paprekur gjashtë herë.
Ndërsa sot, katër gola.
Shpresoj që lojtarët e mi ta kenë kuptuar.
Nëse jo, atëherë do ta përsëris çdo ditë. Mesazh për tifozët? E kuptoj që jeni të lënduar, ju kërkojmë falje. Edhe ne jemi të lënduar.
Por tifozët ta dinë që do të jemi mirë edhe në finalen e Kupës, edhe në gjysmëfinale kundër Sitit.
A i qendroj mendimit se diferenca prej 11 pikësh me Barcelonën nuk reflekton realitetin?
Është më e vështirë për t’u thënë sot, por kjo ndeshje nuk përfaqëson Madridin.
Ju kërkojmë falje, por duhet të shohim përpara“, ka deklaruar Ancelotti.
