Manchester City dhe Liverpooli kanë arritur fitore të rëndësishme në kuadër të xhiros së 28-të në Premier League.
Manchester City ka mundur West Ham Unitedin, me rezultat 3:0 në shtëpinë e vet "Emirates", ndërkohë që Liverpool ka fituar me një gol ndaj Fulhamit në "Anfield".
Pjesa e parë e ndeshjes ndërmjet Man. City dhe West Ham United nuk prodhoi asnjë gol, por në kaptinën e dytë “Qytetarët” kanë shpartalluar mbrojtjen e mysafirëve.
Mbrojtësi Nathan Ake kaloi skuadrën e Pep Guardiolas në epërsi me një gol të bukur, pas një harkimi fantastik të Riyad Mahrezit, në minutën e 50-të.
Më pas, Erling Haaland me një parabolë të bukur dyfishoi epërsinë pas një asistimi të mrekullueshëm të Jack Grealish, në minutën e 70-të. Me këtë gol Erling Haaland theu rekordin e Andy Cole dhe Alan Shearer për më shumë gola në një sezon në Premier League, pasi ky ishte goli i tij i 35-të.
Në fund, Phil Foden vulosi fitoren e Cityt, me një gol të bukur nga distanca, kur po luhej minuta e 85-të. Me këtë fitore, Manchester City udhëheq klasifikimin me 79 pikë, ndërsa West Ham United renditet në pozitën e 15-të me 34 pikë.
Në ndeshjen tjetër, Liverpool ka fituar me vështirësi ndaj Fulhamit. Ndeshja ishte e baraspeshuar, me "Reds" që dominuan në posedim të topit, por që nuk ishin të aftë të finalizonin aksionet. Mohamed Salah doli të jetë përcaktues me një gol nga penalltia, pasi paraprakisht Issa Diop bëri ndërhyrje të palejueshme brenda zonës.
Fulham kishte rastin më të mirë për të shënuar me anë të Carlos Vinicius, por portieri Alisson ia mohoi golin me një pritje të mrekullueshme. Pas kësaj fitoreje, Liverpool renditet në vendin e pestë me 59 pikë, ndërsa Fulham renditet në vendin e dhjetë me 45 pikë.
