Tijjani Reijnders ka qenë një nga lojtarët më të dalluar të Milanit në këto tre ndeshje të para të sezonit në Serie A.
Mesfushori që mbërriti nga AZ Alkmaar për shumën e 19 milionë eurove, duket që tani një investim i mirëmenduar nga drejtuesit kuqezinj.
25-vjeçari ka bërë për vete edhe tifozët e Milanit ndërsa holandezi ka në krahun e tij edhe statistikat të cilat e konfirmojnë si “maratonomakun” e skuadrës.
Është pikërisht Rijnders lojtari që ka vrapuar dhe ka përshkruar më shumë kilometra në fushë në këto tre ndeshje.
Në sfidën ndaj Bolognas, Reijnders përshkroi 12.802 metra, në sfidën e dytë ndaj Torinos, 12.048 metra dhe ndaj Romës, 12.383 metra. Gjithnjë mbi 12 km në fushë për 25-vjeçarin, të cilat e ndihmojnë jashtëzakonisht Milanin në fushë.
Kështu, përveç inteligjencës taktike që është vlerësuar maksimalisht nga trajneri Stefano Pioli, një plus i madh për Reijnders janë edhe mushkëritë të cilët mesa duket nuk e lënë kurrë në baltë holandezin.
