Një gafë administrative, i ka kushtuar Champions-in, futbollistit amerikan të Rojan Antverp, Sam Vines, i cili ka mbetur jashtë ndeshjeve të fazës së grupeve në turneun më të rëndësishëm për klube.
Skuadra ku luan sulmuesi anësor i Kombëtares shqiptare, Arbnor Muja, la jashtë listës aksidentalisht, mbrojtësin 24-vjeçar, i cili ishte një nga më të mirët në fushë, në dy duelet e fazës “play off” ndaj AEK-ut të Athinës.
Futbollisti është i detyruar t’i ndjekë nga tribuna gjashtë sfidat e fazës së grupeve të Champions-it. Është për të ardhur keq që 24-vjeçari nuk do të mund të luajë në Champions për një arsye kaq banale.
Në lidhje më këtë situatë foli edhe trajneri i Antverp, Van Bomel, i cili u shpreh:
“Çfarë mund të them për këtë? Nuk vepruam si duhet. Vines ishte pjesë e listës. Ne bëmë një gabim dhe nuk mund të korrigjohet. Si e ka pritur Vines këtë gafë? Epo…
Të gjithë duan të jenë në atë listë. Sigurisht që është i zhgënjyer. Por ai tani po fokusohet në rehabilitimin e tij, kjo është gjëja më e rëndësishme”, përfundoi Van Bomel.
