Lecce ngec në transfertën e Monzas, ndërsa nuk mundi të merrte më shumë se një pikë në “Brianteo”.
Skuadrat u ndanë me barazimin 1-1 si në gola ashtu edhe në kartonë të kuq, pasi të dyja e mbyllën sfidën me nga dhjetë lojtarë.
Sfida u zhbllokua nga miqtë, të cilët shënuan me penallti me Krstovic në minutën e 3-të. Ndërsa vendasit ia dolën që të gjenin golin e barazimit në minutën e 24’ me Colpani-n.
Në ndryshim nga pjesa e parë që solli dy gola, fraksioni i dytë “nxorri” jashtë dy lojtarë.
Baschirotto mori karton të kuq në minutën e 55’ dhe la skuadrën e Lecces me një lojtarë më pak në fushën e lojës.
Monza tentoi ta shfrytëzonte superioritetin numerik dhe gjeti rrugën drejt rrjetës me Carbonin, por pas verifikimit në VAR ai gol u anulua për pozicion të parregullt.
Në minutën e 85’ Caldirola mori kartonin e dytë të verdhë dhe la fushën e lojës, duke bërë që edhe Monza të mbeste me dhjetë lojtarë.
Në fund gjithçka u mbyll me rezultatin 1-1, me Monzan që pas javës së katërt renditet në vend të 13-të me katër pikë, teksa Lecce, skuadër ku luan edhe mesfushori i kombëtares shqiptare, Ylber Ramadani, renditet në vend të katërt me tetë pikë.
