Kepa Arrizabalaga pëson një dëmtim muskulor në këmbën e djathtë, kështu që do të mungojë për dy deri në tri javë.
Portieri madrilen u lëndua në nxemjen para ndeshjes së Champions League, që të bardhët e fituan të mërkurën kundër Sporting Braga.
Portieri i Real Madridit iu nënshtrua testeve mëngjesin e kësaj të enjteje në ambientet e Valdebebas.
Ekografia tregoi një çarje të vogël në abduktorin e djathtë, në pritje të konfirmimit të gjithçkaje nga kryerja e MRI të premten. Diagnoza e parë nga shërbimet mjekësore të Real Madridit tregon për një kohë të parashikuar të mungesës midis dy dhe tri javësh.
Sa i përket Bellinghamit, i cili gjithashtu nuk luajti ndaj Bragës për shkak të dislokimit të shpatullës, të pësuar të dielën e kaluar kundër Rayo Vallecano, këtë të enjte u stërvit me mbrojtje në vendin e dëmtuar. Carlo Ancelotti do të vendosë në fund nëse anglezi do të luajë të dielën kundër Valencias apo do të pushojë sërish.
Një tjetër lojtar madrilen që do të mungojë me siguri ndaj Valencias është Dani Ceballos, i cili pritet të rikuperohet plotësisht pas pushimit të radhës ndërkombëtar (për shkak të kualifikueseve të kombëtares në nëntor).
