Java e 15-të e Superiores do të sjellë edhe përballjen midis Egnatias dhe Vllaznisë. Një sfidë kjo tepër e vlerësuar nga drejtuesit dhe skuadra shkodrane. Vllaznia vjen në sfidën me Egnatian, pas fitores ndaj Teutës, e cila sipas trajnerit Qatip Osmani ka rikthyer vetëbesimin te futbollistët e tij.
“Sigurisht që pas fitores me Teutën, situata është më e qetë. Është vetëm një fitore, por për ne është shumë e vlefshme për shkak të kthimit të vetbesimit në ekip”.
Trajneri Osmani e di se përballë do të ketë skuadrën kryesuese të superiores, ndaj ka kërkuar nga lojtarët e tij që të shtrytëzojnë në maksimum rastet që do t’u jepen.
“Egnatia, sigurisht që nuk është rastësisht lider në klasifikim. Duhet të luajmë me kujdes, ato raste që do i kemi duhet ti shfrytëzojmë”.
Trajneri i Vllaznisë pranon se do të jetë i kënaqur edhe me një pikë nga përballja me Egnatian.
“Në lojë futemi për ta fituar ndeshjen, por dhe një barazim nuk do të ishte keq”.
Egnatia-Vllaznia luhet të shtunën në orën 13.30.
