Partizani u mposht nga Erzeni në ndeshjen e vlefshme për javën e 18-të të Superiores.
Sfida e zhvilluar në stadiumin “Air Albania”, përfundoi me rezultatin 1-2 në favor të shijakasve.
Pas kësaj sfide, për mikrofonat e MCN TV foli trajneri i Partizanit, Arbër Abilaliaj për të cilin është dhe ndeshja e fundit në pankinën e “Demave” para se t’i lërë vendin Orges Shehit dhe të rikthehet për të bërë vetëm detyrën e drejtorit.
“I druheshim kësaj situate sot duke patur parasysh që në mesjavë jemi konsumuar shumë dhe patjetër trofeu dhe euforia bëjnë të veten. Kemi vuajtur intensitetin e Erzenit. Normal shkuam tek humbja”, u shpreh Abilaliaj.
-Çfarë ke mësuar si trajner për ta përforcuar Partizanin?
“Duhet të them që është një ekip që për momentin ka nevojë për një periudhë pushimi. Janë 4 apo 5 lojtarë që nuk po japin rendimentin e tyre që jemi mësuar t’i shohim.
Sot patëm 2-3 pasiguri me Sotën dhe Hadrojn.
E dinim që Erzeni do të punonte në kundërsulm, pasi këtë lloji loje ka bërë gjatë gjithë këtij sezoni. Gjithsesi momente dhe situata që nuk u zgjidhën dot. Jemi në kërkim për qendërmbrojtës, kemi profile dhe i jemi futur punës.”
-Jeni dominuar nga Erzeni në pjesën e parë. Në rast se do e nisje nga fillimi çfarë mund të bënit më mirë në pjesën e parë?
“Të dhënat reale që masin rendimentin. Posedimi ka qenë i joni dhe Erzeni ka luajtur në kundërsulm.
Është e vërtetë që nuk i kemi rrezikuar, por shumicën e pjesës së parë Erzeni ishte ndërtuar për të luajtur në thellësi si rasti i penalltisë që ishte shumë bujare ashut dhe goli i Mihanës. Nuk është se Erzeni kishte diçka të palexueshme.”
-Largimi i Christian Mba?
“Nuk besoj se do të largohet askush. 6 mujori i dytë është shumë i rëndësishëm.
Të gjithë futbollistët shpresoj që të jenë në organikë përveç Bytyçit që ka një dëmtim të rëndë. Nuk do të ketë asnjë largim, vetëm 2 apo 3 afrime në repartin difensiv. Në 6 mujorin e dytë futemi me lojtarë që do të kenë performancë më të madhe".
