Së pari ndalesa e “Dekretit të Rritjes” me përfundimin e lehtësimit të taksave, më pas përshpejtimi i Interit në treg për të sjellë Buchanan në Milano. Pavarësisht se nuk u përfshi personalisht, në pak ditë Denzel Dumfries u distancua nga ngjyrat zikaltër, duke u bërë protagonist indirekt i peripecive që rrezikojnë të ardhmen e tij në Milano.
Gjithçka sillet rreth rinovimit të kontratës, e cila skadon në vitin 2025 dhe palët janë mjaft të largëta, duke qenë se holandezi do të donte ta dyfishonte pagën e tij, nga 2 milionë e gjysmë në 5 milionë plus bonuse, ndërsa klubi ka vendosur 4 milionë euro në tavolinë.
E gjithë kjo distancë është zgjeruar më tej për shkak të lamtumirës së “Dekretit të Rritjes”, vendosur nga qeveria italiane në fund të vitit 2023, i cili do t’i lejonte Interit të kursente pagën bruto të anësorit nga Roterdami. Me pak fjalë, kjo pikënisje nuk premton mirë. Pa zgjatje të kontratës, lamtumira pas dy sezonesh do të ishte praktikisht e sigurt.
Klubi zikaltër, në fakt, pa një marrëveshje rinovimi do ta hidhte në treg gjatë verës së ardhshme, për të fituar para (pasi e ka paguar rreth 15 milionë, përfshirë bonuset, një vit e gjysmë më parë) dhe shmangur një tjetër largim të dhimbshëm falas, siç ndodhi me Skriniar, i cili iu bashkua PSG-së në fillim të këtij sezoni, pas një telenovele të gjatë për rinovimin.
Që kur mbërriti në Itali në gusht 2021, Dumfries ka bërë 113 paraqitje për zikaltrit. Ai është bërë një lojtar veçanërisht i vlerësuar nga Inzaghi për 3-5-2 e tij, duke marrë parasysh aftësinë për të dhënë asiste dhe kombinuar vesin e portës, me mësymjen në zonën e kundërshtarit për të marrë penallti.
Një aspekt për t’u kujdesur ka qenë gjithmonë vazhdimësia në performancë, por nën drejtimin e trajnerit të Interit ka pasur përmirësime të dukshme për të hedhur hapa përpara. Shembulli më i mrekullueshëm erdhi në fillim të sezonit aktual, me holandezin e lindur në 1996 në gjendje të jepte një kontribut të rëndësishëm në aspektin sulmues me inkursionet e tij në 20 metrat e fundit të fushës.
Një aspekt tjetër që nuk është aspak i papërfillshëm është mbyllja e marrëveshjes së Buchanan, i cili erdhi si një përforcim për të mbuluar boshllëkun e lënë nga Cuadrado, por shihet titullar i mundshëm i krahut të djathtë të Interit në të ardhmen. Do të ketë punë për të bërë në nivel taktik dhe rezultatet do të duhet të analizohen në fushë, por ardhja e kanadezit sigurisht që paraqet një sinjal.
Në gjashtë muajt e ardhshëm, ish-lojtari i Bruges do të jetë në gjendje ta bëjë më pak traumatike ndarjen nga Dumfries, duke u propozuar si një anësor i së ardhmes. Kjo, duke pasur parasysh edhe moshën 24 vjeçare dhe aftësitë teknike të shfaqura me fanellën e Bruges.
Në “Viale della Liberazione”, në fakt, Marotta dhe Ausilio janë të bindur se tashmë kanë marrë masa paraprake, duke u përballur edhe me kontratën e Cuadrado (duke lënë mënjanë problemet fizike) që skadon në qershor. Nga çdo këndvështrim, ka një udhëkryq të rëndësishëm në atë korsi dhe Dumfries do të duhet të vendosë në javët e ardhshme se cilën rrugë do të marrë, për të qëndruar në Milano apo jo.
