Sulmuesi shqiptar Arbnor Muja ka gjetur rrugën e rrjetës në ndeshjen e tij të parë me fanellën e ekipit të ri Yilport Samsunspor në duelin ndaj Antalyaspor.
Ky duel mes dy skuadrave turke po zhvillohej në kuadër të javës së 25-të në elitën e futbollit turk.
Muja e nisi ndeshjen nga banka rezervë, për t’u inkuadruar pastaj në minutën e 69-të.
Po zhvillohej minuta e 91-të e ndeshjes kur Muja u gjend mjaft mirë në zonë për të shënuar për 2-0 pas asistimit të bashkëlojtarit të tij Carlo Holse.
Me këtë fitore Samsunspori ka shkuar në kuotën e 29 pikëve në Superligën e Turqisë, duke bërë një hap të madh në luftën për mbijetesë.
Kujtojmë që Muja u bë pjesë e ekipit turk para tri ditësh pas një aventure në Belgjikë me Royal Antwerpin, duke nënshkruar një kontratë për tri vite e gjysmë.
