Albi Mall Superliga e Kosovës rikthehet në aksion me ndeshjet e xhiros së 25-të që do të zhvillohen në mesjavë.
Në program janë tre sfida ditën e sotme (e mërkure) dhe dy të tjera nesër (e enjte) me fillim nga ora 13:00.
Padyshim që ndeshja kryesore e ditës së sotme dhe kësaj xhiro do të zhvillohet në stadiumin ‘Liman Gegaj’ në mes Malishevës dhe Llapit.
Vendasit vijnë në këtë sfidë pas humbjes nga Ballkani dhe synojnë të rikthehen te rezultatet pozitive, ndërsa Llapi në top formë kërkon fitoren e radhës.
Sfidë shumë interesante do të zhvillohet edhe në stadiumin ‘Sami Kelmendi’ ku Fushë Kosova pas katër pikëve radhazi synon ta befasoj edhe kampionin në fuqi Ballkanin. Në anën tjetër suharekasit kanë synim vetëm tre pikët për ta mbajtur pozitën e parë në tabelë.
Dueli i fundit i ditës së sotme, por jo nga rëndësia zhvillohet në Gjilan. Dy skuadrat që ende nuk e kanë shijuar fitoren në pranverë Gjilani dhe Liria do të përballen në një sfidë shumë të rëndësishme.
Gjilanasit kërkojnë tre pikët për të shtuar gjasat që t’i ikin barazhit, derisa mysafirët thuajse të dorëzuar për mbijetesë synojnë të shkaktojnë befasi.
