Yann Aurel Bisseck mendon se sezoni i tij debutues në Inter ishte "më i mirë nga sa prisnin shumica", por këmbëngul se lojtarët nuk po mendojnë për rekordin e pikëve. "Ne thjesht duam të fitojmë çdo ndeshje", tha ai.
Bisseck foli për “DAZN” pas fitores 5:0 të Interit ndaj skuadrës së Frosinones mbrëmë (të premten).
“Ne e dinim se nuk do të ishte një lojë e lehtë dhe ndoshta, në javët e fundit, nuk ishim aq të fortë sa njerëzit na njihnin këtë sezon, por mendoj se ne luajtëm një lojë të mirë. Edhe ata bënë një lojë të mirë, por fitoi skuadra më cilësore”, tha mbrojtësi gjerman.
Çfarë ka mësuar në sezonin e tij të parë në Meazza?
“Mbaj mend javët e para këtu. Ishte e vështirë të mësoje taktikat dhe gjithçka. Si mbrojtës, është një përvojë e madhe, e madhe mësimore në Itali, dhe mendoj se kam kaluar një kohë të mirë këtu – ndoshta më mirë nga sa prisnin shumica. Kështu që jam i kënaqur me mënyrën se si mund të kontribuoj për ekipin dhe jam gjithmonë i lumtur kur trajneri më jep mundësinë të luaj”, tha Bisseck.
Interi do të vendosë një rekord të ri pikësh në një sezon të vetëm nëse fiton dy ndeshjet e ardhshme të ligës, duke arritur në 98 pikë. A i jep kjo skuadrës më shumë motivim?
"Unë jam personi i gabuar për të pyetur, ju duhet të pyesni trajnerin," u përgjigj Bisseck.
“Si lojtarë, ne duam vetëm të fitojmë çdo ndeshje. Nëse kemi një rekord në fund, është mirë, por nuk do të thosha se është fokusi kryesor, ne thjesht shkojmë ndeshje pas ndeshje dhe thjesht duam të fitojmë çdo lojë”, shtoi më tej ai.
Interi u bë kampion i Serie A për herë të 20-të më 22 prill pasi mundi rivalin e qytetit, Milanin.
