Prokuroria Themelore në Mitrovicë ka ngritur aktakuzë ndaj një të dyshuari i cili ka tentuar t’i vejë flakën veturës së gazetarit Shkumbin Kajtazi.
Në njoftimin e Prokurorisë thuhet se Departamenti i Përgjithshëm, ka ngritur aktakuzë, në Gjykatën Themelore në Mitrovicë, kundër të pandehurit E.J., në drejtim të veprës penale “Zjarrvënia”.
“Prokuroria Themelore e Mitrovicës njofton opinionin sei pandehuri, më 13 qershor 2020, i shtyrë nga motive të ulëta, si rezultat i mendimeve e qëndrimeve të tij personale, i pakënaqur me përmbajtjen e shkrimeve në portalin “Jepi zë”, me dashje ka tentuar ti vë flakën veturës së të dëmtuarit Sh.K”.
“I pandehuri E.J., duke e ditur vendndodhjen e veturës së të dëmtuarit,fillimisht e mbush një shishe të plastikës me benzinë, e stërpikë veturën në pjesën e motorit dhe në gomën e parë të veturës, dhe me një letër të ndezur tenton ti vë flakën veturës, por me të dëgjuar alarmin e veturave të policisë ikë nga vendi i ngjarjes, duke mos arritur kështu ta realizojë qëllimin e tij”, shkruhet në njoftimin e Prokurorisë.