Podujeva është bërë qyteti i parë me shtatore të veprimtarit të çështjes kombëtare, Adem Demaçi, i cili u cilësua si hero i mendimit të lirë.
Shtatorja u përurua në shesin e qytetit, ku përveç një numri të madh të qytetarëve, morën pjesë edhe përfaqësues të institucioneve të Kosovës e Shqipërisë.
Kryeministri Albin tha se njeriu i popullit, baca Adem ishte personalitet unik në veprimin dhe me gjuhën e tij në vetëmohimin për të tjerët dhe në shqipen tonë të dashur.
Kurti: Demaçi, heroi jonë i mendimit të lirisë
“Na nevojitet një homazh i thellë për një shpirt kaq gjithëpërfshirës, ngase u deshtë një guxim i madh për ta mbajtur një shpirt kaq të lirë, kërkohet një vetëdije e paskaje për ta mbajtur një vetëdije të paepur. Për ne si ndjekës të përpjekjeve të tij do të jetë gjithnjë e vështirë të përkufizojmë personalitetin e kësaj përmase por na duhet t’i përkufizojmë në gjuhë dhe në gurë sepse këta janë dy binarët ku mbështetet treni ynë i historisë. Mbi vargun dhe kullën, ne urojmë që monumenti ynë kushtuar heroit tonë të mendimit të lirisë të jetë edhe kullë edhe gjuhë”, tha ai.
Sipas Kurtit, ata që jetojnë me të vërtet nuk janë të shpeshtë dhe kanë një virtyt të pashoq, shprehja e tyre është e barabartë me jetën e tyre, Adem Demaçi na mëson një direktivë të lartë për të gjithë “Kur diktatura nuk e kërcënon lirinë, atëherë duhet dyshuar te liria”.
Kurti: Adem Deçaqi e ktheu lirinë në kusht të ekzistencës
“Ky njeri i madh të cilit sot ia lartësojmë në mënyrë solemne peshën e gurit, e ktheu lirinë në kusht të ekzistencës dhe në përvojën intime apsolute. Një përvojë e tillë e lirisë e meriton një monument e më shumë. Ky monument dhe fjalët që do ta shoqërojmë me dekada e kanë një synim, në çdo kohë e çdo paqe duhet të na tregojnë se nuk i përkasim asnjë rendi merite po e huqim referencën te baca Adem, si përvojë gjigante e furtunave që i përballte dhe i përvujturi më i fortë i lirisë nën çdo kusht. Adem Demaçi prehet i qet sepse jetojë përnjëmend, ai e kishte devizën e vet, nuk ka pse vlen një jetë pa drejtësinë që duhet për ta mbajtur gjallë”, tha ai, duke shtuar se kjo përmendore është shenja e guximit dhe barra e drejtësisë, që ne i tregojmë vetvetes si garancë të një të ardhme që ia vlen.
Kryetari i Komunës të Podujevës, Shpejtim Bulliqi tha se Llapi nuk është thjesht vendlindja e bacës Adem por edhe vendi dhe familja e tij e madhe, ku ai u brumos me frymën atdhetare.
Bulliqi: Podujeva është qyteti i parë që do ta ketë shtatoren e bacës Adem
“Këtij luftëtari që punojë deri në frymën e fundit për lirinë dhe pavarësinë e popullit të tij, që sakrifikojë jetën e tij në shërbim të kauzës jetësore për liri, drejtësi dhe bashkim. Jam i lumtur që Podujeva është qyteti i parë që do ta ketë shtatoren e bacës Adem, për arsye se i takon Podujevës dhe Llapit. Llapi nuk është thjesht vendlindja e bacës Adem por edhe vendi e familja e tij e madhe ku ai u brumos me frymën atdhetare“, tha ai.
Shqiptar Demaçi, djali i veprimtarit Adem Demaçi falënderoi të gjitha ata që kontribuuan për ngritjen e shtatorës së Adem Demaçit në Podujevë, derisa shtoi se është mirë që një e tillë të jetë edhe në sheshin e Prishtinës.
Demaçi: Urime qytetit të Podujevës për nderin që ia bëni Adem Demaçit
“Së pari urime qytetit të Podujevës për nderin që ia bëni Adem Demaçit, po ashtu duke nderuar edhe veten dhe qytetin...përpos që po ngritët sot shtatorja këtu, ne presim që planet e bëra në Prishtinë, për ngritjen e shtatores së Adem Demaçit në Prishtinë të cilat janë qe katër vjet, është mirë që të riaktiluzohen dhe atje ku është vendi, sheshi i Adem Demaçit të rregullohet puna“, tha ai.
Manifestimi vazhdoi me program kulturor. Përndryshe, skulptori i shtatores të Demaçit ishte Agron Blakqori.
