Policia e Kosovës në raportin 24 orësh ka njoftuar për tri vepra penale që janë kryer nga persona të ndryshëm në Aeroportin Ndërkombëtar të Prishtinës “Adem Jashari”.
Në rastin e parë policia ka ndaluar të dyshuarin mashkull, pasi që gjatë kontrollit ka prezantuar dokumente të cilat dyshohen të jenë të falsifikuara.
“Dokumentet janë konfiskuar, ndërsa me vendim të prokurorit, i dyshuari është liruar dhe rasti shkon në procedurë të rregullt”, thuhet në raport.
Në rastin e dytë është ndaluar i dyshuari mashkull kosovar, pasi që gjatë kontrollit në valixhen e tij, është gjetur dhe konfiskuar një elektroshok. Me vendim të prokurorit, rasti shkon në procedurë të rregullt.
Dhe në rastin tjetër është kërkuar që të largohet nga aeroplani i dyshuari mashkull kosovar, pasi që ka penguar personelin e aeroplanit gjatë kryerjes së detyrës.
Me vendim të prokurorit, pas intervistimit i dyshuari është liruar dhe rasti shkon në procedurë të rregullt.
