Një granatë dore është gjetur në oborrin e shtëpisë së një serbi, në fshatin Mogillë të komunës së Kllokotit.
Granata ishte vjetruar, ngjyrë e gjelbër dhe e siguruar me sigurues.
Policia njoftoi se banorët e zonës janë evakuuar në një zonë të sigurt.
“Patrulla e policisë së stacionit policor në Kllokot menjëherë ka dalë në vendin e ngjarjes dhe pas shikimit të vendit të ngjarjes, ka vërejtur se bëhet fjalë për një granatë dore me ngjyrë të gjelbër, e vjetërsuar, e pashpërthyer dhe e siguruar me sigurues”, njofton policia.
Njoftimi i plotë:
Drejtoria Rajonale e Policisë në Gjilan, Stacioni Policor në Kllokot, ka pranuar ankesë nga Z.J. (1963) kosovar serb nga fshati Mogillë, komuna Kllokot, se në oborrin e shtëpisë së tij ka gjetur një mjet të dyshuar.
Patrulla e policisë së stacionit policor në Kllokot menjëherë ka dalë ne vendin e ngjarjes dhe pas shikimit të vendit të ngjarjes, ka vërejtur se bëhet fjalë për një granatë dore me ngjyrë të gjelbër, e vjetërsuar, e pashpërthyer dhe e siguruar me sigurues.
Menjëherë janë evakuuar banorët në një perimetër të nevojshëm dhe është siguruar vendi i ngjarjes.
Në vendin e ngjarjes kanë dalë Njësiti për Deminim i FSK-së dhe Njësiti për Deminim nga KFOR-i Amerikan, po ashtu edhe Njësiti i Hetimeve Rajonale Gjilan.
Granata është tërhequr e pashpërthyer nga njësitet përkatëse.
Në lidhje me rastin është njoftuar Prokurori i Shtetit, i cili ka urdhëruar që të iniciohet rasti “Shkaktim i rrezikut të përgjithshëm” dhe rasti të dërgohet në Njësitin e Hetimeve Rajonale për hetime të mëtejme.
