Një grua ka vdekur të hënën mbrëma në Shtime.
Rasti ka ndodhur të hënën mbrëma në Shtëpinë e të Moshuarve me Aftësi të Kufizuara.
Kështu tha Kanun Veseli, zëdhënës i policisë për rajonin e Ferizajt.
Veseli tha se dyshohet se viktima ishte ngulfatur nga ushqimi.
Ai theksoi se rasti është cilësuar “Hetim mbi vdekjen”.
“Me datën 15.05.2023 rreth orës 19:30 , policia e stacionit në Shtime ka pranuar një informacion se një person D.S ( F/K) e moshës 21 vjeçare paciente nga “Shtëpia e fëmijëve ” në Shtime, për ndihmë mjekësore fillimisht është dërguar në Qendrën e Mjekësisë Familjare në Shtime dhe më pas me autoambulancë është dërguar në Qendrën Emergjente në Ferizaj, ku nga mjekët është konfirmuar vdekja e saj”, tha Veseli.
“Hetuesit dhe krimteknikët rajonal kanë dalë në vendin e ngjarjes dhe nën autorizim të prokurorit kujdestar i kanë nisur hetimet. Me vendim të prokurorit kujdestar trupi i pajetë është dërguar në Institutin e Mjekësisë Ligjore në Prishtinë për obduksion”, tha ai.
