Policia e Kosovës ka njoftuar se ka arrestuar tre të dyshuar lidhur me rastin “Shkaktim i rrezikut të përgjithshëm”, të ndodhur më 16 maj rreth orës 22:30, në rrugën “Knjaz Millosh” në fshatin Uglarë.
Sipas njoftimit të Policisë të dyshuarit janë të mitur, 17 vjeçarë.
“Identifikimi i të dyshuarve si dhe lokalizimi i vendndodhjes së tyre ka ardhur si rezultat i një pune të shkëlqyer hetimore nga ana e policisë të cilët me një ekspertizë të thellë trajtuan të gjitha informacionet dhe evidencat e gjetura, të cilat më pas quan drejt realizimit të operacionit dhe kapjen e personave të dyshuar, të mitur;D. H, mashkull, 17 vjeç, shtetas i Republikës së Kosovës, D. J, mashkull, 17 vjeç, shtetas i Republikës së Kosovës, A. G, mashkull, 17 vjeç, shtetas i Republikës së Kosovës, “, thuhet në njoftimin e Policisë.
Arrestimi i të dyshuarve është përcjellë edhe me gjetjen dhe sekuestrimin e “një revole me gaz, e cila dyshohet të jetë arma e përdorur në rast.”
Të dyshuarit me aktvendim mbi ndalimin e personit të arrestuar të nxjerrë nga ana e prokurorit të shtetit janë dërguar në mbajtje prej 24 orësh, përderisa ndaj tyre është iniciuar një hetim në drejtim të veprave penale “Shkaktim i rrezikut të përgjithshëm” dhe “Mbajtje në pronësi kontroll ose posedim të pa autorizuar të armës”.
