Anëtarët e familjeve shpeshherë përfshihen në konflikte verbale e zënka të shumta. Madje në shumë raste, telashet eskalojnë edhe në dhunë fizike e kapërcejnë edhe muret e shtëpisë, duke u dashur kështu me doemos ndërhyrja e organeve të rendit.
Një rast i tillë ka ndodhur dje në një familje në Prizren, ku djali 21-vjeçar dyshohet se ka tentuar ta sulmojë fizikisht babanë e tij.
Burimet brenda Prokurorisë kanë bërë me dije se babai ka denoncuar rastin në Polici, ku ka deklaruar se pas një konflikti për pagesën e një vize, djali i tij ka tentuar ta sulmojë, por që pas ndërhyrjes së familjarëve të tjerë, është parandaluar konfrontimi fizik.
Si rezultat i denoncimit, i dyshuari është arrestuar dhe është shoqëruar në stacion policor për intervistim.
21-vjeçari ka mohuar të ketë tentuar ta sulmojë babanë e tij, teksa tha se mes tyre ka pasur mosmarrëveshje.
Prokurori ka urdhëruar që i dyshuari të dërgohet në mbajtje dhe i njëjti do të hetohet për veprën penale ‘Dhunë në familje’.
