Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i rëndë ka ndodhur mbrëmë në një familje në Gjilan, ku një person dyshohet se ka ushtruar dhunë ndaj familjarëve të tij.
Mësohet se babai e ka denoncuar rastin në Polici, ku ka deklaruar se pas një konflikti me të birin, 21-vjeçari e ka fyer e ofenduar dhe ka tentuar ta sulmojë atë dhe anëtarët tjerë të familjes, duke i shkaktuar frikë e shqetësim të madh.
Burimet thonë se çka e bën edhe më shqetësues këtë rast është se i dyshuari është përdorues i substancave narkotike, si dhe përsëritës i veprave të ndryshme penale.
Si rezultat i denoncimit, Policia është vënë në lëvizje dhe ka arrestuar të dyshuarin, i cili më pas është shoqëruar në stacion policor për intervistim.
Me urdhër të Prokurorit të Shtetit, rasti është iniciuar ‘Dhunë në familje’ dhe i dyshuari është dërguar në mbajtje.
