Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, biznese e institucione financiare që po shkaktojnë humbje e pasiguri. Hajnat në të shumtën e rasteve arrijnë që të ikin nga duart e organeve të rendit, por ka të atillë që kapen pas veprimeve hetimore të Policisë.
Kështu e pësoi edhe një i ri, i cili së fundi përfundoi në pranga. Burimet brenda Prokurorisë kanë bërë me dije se i dyshuari është Ragip Selimi, 26-vjeçar.
Selimi gjatë ditës së djeshme është shoqëruar në stacion policor në Graçanicë, pasi i njëjti dyshohet se ka kryer tri vepra penale.
Selimi është intervistuar nga organet e hetuesisë dhe me vendim të prokurorit është dërguar në mbajtje.
26-vjeçari do të hetohet nën dyshimet për kryerjen e veprave penale ‘Vjedhje’, ‘Vjedhje e rëndë’ dhe ‘Dëmtim apo asgjësim i pasurisë’.
