Dhuna ndaj vajzave dhe grave në vendin tonë ka marrë përmasa shqetësuese. Në të shumtën e rasteve, të dyshuar janë partnerët e tyre, të cilët ushtrojnë dhunë në forma të ndryshme, duke i detyruar ato që të kërkojnë edhe mbrojtje institucionale. Në të tilla situata, dera e Policisë mbetet për to adresa e duhur për të kërkuar ndihmë në zgjidhjen e problemeve. Por pavarësisht denoncimeve, të dyshuarit shpesh vazhdojnë të përsërisin veprën e njëjtë, e që shumë herë ka përfunduar në mënyrë tragjike për gratë.
Në hall me bashkëshortin e saj është edhe një grua e moshuar në qytetin e Pejës, e cila disa herë e ka denoncuar atë për dhunë në familje.
Burimet e medias brenda Prokurorisë kanë bërë me dije se në rastin e fundit, viktima bashkë me vajzën e saj, ku kanë rrëfyer se i dyshuari ushtron dhunë sistematike psikike ndaj 68-vjeçares.
Bazuar në dëshminë e të moshuarës, 81-vjeçari i ka kërkuar asaj që t’i tërheq denoncimet ndaj tij. Në momentin që ka hasur në kushtëzimin e viktimës që ai ta përmirësojë sjelljen ndaj saj për t’ia plotësuar kërkesën, i dyshuari e ka kërcënuar se do ta vrasë nëse s’i tërheq denoncimet.
I dyshuari po ashtu dyshohet se ka shkaktuar edhe dëme materiale në shtëpi, duke dëmtuar orenditë.
Pas intervistimit nga organet e hetuesisë, Prokurori i Shtetit ka urdhëruar që ai të hetohet në liri për veprën penale ‘Dhunë në familje’.
