Nuk janë të rralla rastet kur qytetarët kërkojnë ndihmën e Policisë për t’i gjetur familjarët e tyre që raportohen të zhdukur. Të shqetësuar për fatin e tyre, ata raportojnë rastet në Polici, me shpresën se do të marrin informacione për vendndodhjen e tyre. Media raportoi për një rast të tillë, që është denoncuar në Gjakovë.
Një vajzë 16 -vjeçare ishte larguar nga shtëpia të martën dhe nuk dihej asgjë për vendndodhjen e saj, derisa babai i saj kërkoi ndihmë në Polici dhe si rezultat sot u lokalizua vendndodhja e saj.
Burimet brenda Prokurorisë kanë bërë me dije se vajza është gjetur në një fshat në Prizren, duke bashkëjetuar me një 22-vjeçar, i cili tashmë është arrestuar.
Mësohet se e mitura ka dhënë deklaratën e saj lidhur me rastin dhe para hetuesve policorë ka bërë me dije ndër të tjera se nuk është abuzuar nga i dashuri i saj. Pas ekzaminimeve të kryera nuk janë vërejtur shenja të dhunës apo keqtrajtimit dhe gjendja e saj shëndetësore është e mirë.
Ndërsa ndaj 22-vjeçarit është iniciuar rasti nën dyshimet se ka kryer veprën penale “Bashkësia jashtëmartesore me personin nën moshën gjashtëmbëdhjetë vjet” dhe i njëjti është dërguar në mbajtje.
