Armët zyrtare të pjesëtarëve të Policisë së Kosovës ka raste kur bien në duar të gabuara, të cilët i keqpërdorin ato. Për një rast të tillë që dyshohet se ka ndodhur në Prishtinë, Prokuroria ka nisur hetimet.
Burimet e sinjalit bëjnë me dije se një person dyshohet se ka marrë armën e nënës së tij police, pa dijeninë e saj dhe më pas të njëjtën e ka përdorur në një rast në Kolovicë.
Sipas burimeve, një shtetas i huaj derisa po shëtiste me qentë e tij, ka dëgjuar një të shtënë arme dhe i njëjti më pas ka vërejtur se njëri prej qenve është goditur nga plumbi.
Pas veprimeve hetimore është arritur që të zbulohet identiteti i të dyshuarit, i cili është arrestuar dhe është shoqëruar në stacion policor për intervistim.
29-vjeçari ka pranuar para hetuesve policorë se arma e cila është përdorur në rast, i përket nënës së tij e cila është zyrtare policore.
Në kuadër të veprimeve hetimore, është intervistuar në cilësinë e dëshmitares edhe nëna e të dyshuarit, e cila ka njoftuar se i dyshuari ka marrë armën pa dijeninë e saj.
Në vendin e ngjarjes është sekuestruar arma bashkë me karikatorë dhe fishekë.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor nën dyshimet për kryerjen e veprës penale ‘Përdorim i armës apo mjetit të rrezikshëm’.
