Ministri i Punëve të Jashtme të Serbisë, Nikola Selakoviq, u takua me të Dërguarin Special të Sekretarit të Përgjithshëm të Kombeve të Bashkuara dhe Shefin e Misionit të OKB -së në Kosovë, Zahir Tanin, shkruan Kosovo-online, transmeton gazeta “Bota sot”.
Selakoviq tha se Serbia këmbëngul në domosdoshmërinë e respektimit të vazhdueshëm të Rezolutës 1244 të Këshillit të Sigurimit të OKB -së, dhe nënvizoi se është e një rëndësie kyçe për Serbinë që të vazhdojë angazhimin e UNMIK -ut në një fushë të pakufizuar dhe me një mandat të pandryshuar.
Në bisedë, Selakoviq iu referua edhe situatës së fundit në vendkalimet midis Kosovës dhe Serbisë qendrore.
Kreu i diplomacisë serbe theksoi se veprimi i njëanshëm është mënyra më e keqe për të zgjidhur mosmarrëveshjet, sepse në atë mënyrë prodhohen probleme, jo zgjidhje.
Sipas tij, nuk ka alternativë të arsyeshme për dialogun.
Selakoviq nënvizoi se Beogradi do të vazhdojë të këmbëngulë në mbrojtjen e popullsisë serbe në Kosovë dhe ruajtjen e paqes dhe stabilitetit.
Duke folur për rëndësinë e shqyrtimit të rregullt të çështjes së Kosovës në Këshillin e Sigurimit të OKB -së dhe sesionit të ardhshëm mbi punën e UNMIK -ut, Selakoviq tha se ai pret që ngjarjet e fundit në Kosovën veriore të prezantohen në mënyrë adekuate dhe objektive në Raportin e Sekretarit të Përgjithshëm të OKB -së.
Selakoviq shtoi se ishte shumë i shqetësuar se numri i sulmeve që synonin serbët dhe pronën e tyre, si dhe pronat e Kishës Ortodokse Serbe, ishte rritur në periudhën e kaluar, duke vënë në dukje se 106 incidente të tilla të motivuara etnikisht ishin regjistruar që nga fillimi i viti.
Kur bëhet fjalë për dialogun midis Beogradit dhe Prishtinës, Selakoviq shpjegoi se Beogradi i afrohet bisedimeve në mënyrë konstruktive dhe se është i përkushtuar për të gjetur zgjidhje kompromisi.
Ai gjithashtu deklaroi se kanë kaluar tetë vjet nga nënshkrimi i Marrëveshjes së Brukselit dhe se nuk ka pasur përparim në zbatimin e obligimeve të ndërmarra nga Prishtina, kryesisht në lidhje me themelimin e Bashkimit të Komunave Serbe.
