Qëllimi i Francës është një Ballkan Perëndimor stabil dhe i begatë, ka deklaruar ambasadori francez në Beograd, Pierre Cochard, duke theksuar se Franca dëshiron që ky rajon të jetë një hapësirë e demokracisë, lirisë dhe marrëdhënieve ekonomike transparente, transmeton agjencia serbe e lajmeve Tanjug.
Në një intervistë për gazetën serbe “Politika”, ai ka thënë se lëvizja e njerëzve dhe shkëmbimi i mallrave në këtë rajon ende nuk është e lirë dhe e lehtë dhe se duhet bërë shumë në fushën e pajtimit, sepse në të kundërtën rajoni do të destabilizohet.
“Faktorët e stabilizimit janë integrimi në Bashkimin Evropian, pajtimi dhe miratimi i standardeve evropiane. Serbia tashmë ka 60 për qind të tregtisë së saj me Bashkimin dhe BE i jep Serbisë 300 milionë euro ndihmë në vit”, ka thënë Cochard.
Ai gjithashtu ka deklaruar se Franca ka rritur ndjeshëm investimet e saj përmes Agjencisë Franceze për Zhvillim dhe shtoi se synimi është të bëjmë edhe më shumë, gjë që, sipas tij, do të jetë temë e konferencës BE-Ballkani Perëndimor në fund të presidencës franceze.
Cochard gjithashtu ka thënë se aspirata është ruajtja e zonës Shengen si një hapësirë ku njerëzit mund të lëvizin lirshëm dhe të kalojnë lirisht kufijtë.
“Shtetet duhet të bashkëpunojnë më mirë në mënyrë që ta ruajnë këtë, ata kanë nevojë për më shumë solidaritet, si dhe për të krijuar një mekanizëm për një përgjigje të unifikuar në situata të tilla si kriza e emigrantëve, dhe kjo është një temë e rëndësishme për presidencën franceze”, ka thënë Cochard.
Ai ka shpjeguar se bëhet fjalë për kontrollin më të mirë të kufijve nga BE-ja dhe ka theksuar se Serbia, si vend në kufi me BE-në, luan një rol të rëndësishëm në këtë.
Franca merr presidencën gjashtëmujore të Këshillit të BE-së më 1 janar.
