Kamberi: Morëm zotimin e Escobarit se do t’i sugjerojë Lajçakut takim me ne

Lajme

Kamberi: Morëm zotimin e Escobarit se do t’i sugjerojë Lajçakut takim me ne

Më: 25 tetor 2022 Në ora: 23:47
Shaip Kamberi

Liderët shqiptarë të Luginës së Preshevës, ditë më parë, u pritën në Departamentin Amerikan të Shtetit, ku kërkuan që çështja shqiptare e Luginës të jetë pjesë e dialogut Kosovë-Serbi.

Deputeti shqiptar në Parlamentin e Serbisë, Shaip Kamberi, tha se kanë marrë zotim nga emisari amerikan për Ballkanin Perëndimor, Gabriel Escobar, që do t’i sugjerojë homologut të tij evropian, Miroslav Lajçak, një takim me përfaqësuesit shqiptarë të Luginës.

“Kemi marrë zotimin nga [Gabriel] Escobar se do të bisedojë me [Miroslav] Lajçakun dhe do t’i sugjerojë një takim me ne. Ne edhe ashtu i kemi bërë kërkesë për takim dhe presim që kësaj radhe të ketë përgjigje pozitive, pasi çështja e Luginës pashmangshëm duhet të jetë temë e bisedave”, tha ai në RTK.

Ai ka thënë se gjatë takimit me Escobar e përsëritën qëndrimin e tyre se është e papranueshme që zyrtarët e BE-së të takohen me liderët serbë të veriut të Kosovës që janë në listën e zezë amerikane, ndërkohë që mohohet çfarëdo takimi me përfaqësuesit shqiptarë në Luginë të Preshevës.

“Nëse dëshirohet qetësi në Ballkanin Perëndimor dhe nëse dëshirohet normalizim i raporteve Kosovë-Serbi, veç çështjeve problematike mes dy shteteve, çështja e shqiptarëve të Luginës së Preshevës është një çështje që mund të prodhojë tensione dhe ne e shohim zgjidhjen duke respektuar parimin e reciprocitetit në të drejta, respektivisht duke ndërtuar standarde të njëjta të trajtimit të pakicave që do të vlenin në të dyja shtetet”.

Ai ka thënë se nuk do të ketë normalizim qenësor të marrëdhënieve ndërmjet dy shteteve, nëse Serbia vazhdon me trajtimin e këtillë të shqiptarëve të Luginës së Preshevës me metoda të diskriminimit e i cili, sipas tij, po shkon deri në skajshmëri duke e zbrazur Luginën e Preshevës nga rinia shqiptare.

commentFirst article
Sot mund të lexoni Shfletoni kopertinat