“Prishtina po na mbështet përzemërisht”, tha ambasadori ukrainas në Beograd, Volodymyr Tollkaç.
“Qytetarët në Ukrainë po na pyesin pse Kievi s’e njeh pavarësinë e Kosovës kur Prishtina po na mbështet përzmerësisht. Ne po e kemi të vështirë t’ua shpjegojmë”.
Kështu i tha portalit vojvodinas “Autonomija”, ambasadori ukrainas, teksa shpjegoi edhe se si Rusia në Ballkanin Perëndimor shfrytëzon problemet e pazgjidhura, korrupsionin, blerjen e mediave, shantazhin përmes energjisë, shpalosjen e informacioneve komprometuese për politikanë, si dhe manipulimin me konceptet si “vëllazëria sllave”.
Kosova ka qenë mbase më vokalja në rajon në dënimin e agresionit rus në Ukrainë që nga 24 shkurti dhe e para në bashkërendimin me sanksionet perëndimore ndaj Federatës Ruse.
Për mbështetjen kosovare ndaj Ukrainës, ka pasur edhe deputetë që e kanë çmuar atë dhe kanë bërë thirrje që Ukraina duhet me doemos të njohë pavarësinë e Kosovës.
