“Fakti që fuqitë e mëdha nuk e njohin, gjegjësisht nuk kanë ndërmend të respektojnë Rezolutën 1244, për ne do të thotë se kemi shumë pak mundësi për të bërë diçka”, thoshte presidenti i Serbisë, Aleksandar Vuçiq.
Ai e tha këtë në vitin 2018, duke iu përgjigjur pyetjes së një gazetari nëse Serbia, mund t’i kthejë trupat e saj në Kosovë, duke u thirrur në atë rezolutë.
“Nuk është e drejtë dhe nuk është e drejtë, por ne po luftojmë në përputhje me mundësitë shumë të vogla dhe në një hapësirë shumë të ngushtë manovrimi dhe është e jona të luftojmë”, deklaroi atëherë Vuçiq dhe shtoi se është paralajmëruar personalisht për idenë e kthimit të 1000 ushtarëve serbë në Kosovë “që nëse provojmë do të biem në konflikt me fuqinë më të madhe ushtarake në botë”.
“Nëse përpiqeni të hyni në Kosovë me ushtrinë dhe policinë tuaj, NATO do ta trajtojë atë si një akt armiqësor”, tha Vuçiq në atë kohë.
“Ata e justifikuan me faktin se një veprim i tillë do të binte ndesh me rezolutën për Jerusalemin. Atëherë u thashë se të gjithë së bashku veprojnë ilegalisht kur e shkatërrojnë Rezolutën 1244 dhe pastaj ngrenë supet, shikojnë këshilltarët e tyre dhe asgjë”, thoshte Vuçiq.
“Vetëm e drejta e forcës është e vlefshme, dhe në përputhje me rrethanat ne duhet të përpiqemi të ruajmë paqen dhe sigurinë dhe që të gjithë ne të ndërtojmë një jetë më të mirë dhe një ekonomi më të fortë”.
Ato ditë para katër viteve, delegacioni i Kosovës njoftoi se nuk do të merrte pjesë në takimin e 7 dhe 8 qershorit në Bruksel me temën e themelimit të Asociacionit të Komunave me Shumicë serbe, derisa Serbia të përmbushë të gjitha marrëveshjet e Brukselit.
Megjithatë, presidenti i Serbisë ka njoftuar të hënën se Qeveria e Serbisë do të marrë vendim të enjten për t’i dërguar kërkesë KFOR-it për kthimin e forcave serbe të sigurisë në Kosovë.
Por, Shtetet e Bashkuara të Amerikës e kanë kundërshtuar këtë publikisht.
I dërguari i posaçëm amerikan për Ballkanin Perëndimor, Gabriel Escobar, u shpreh të martën se Kosova ka garanci shumë të forta të sigurisë nga Shtetet e Bashkuara.
SHBA-ja, thotë ai, e kundërshton dhe e refuzon në mënyrë kategorike kërkesën e Serbisë për kthimin e forcave të saj në Kosovë.
