Drejtori i të ashtuquajturës zyrë për Kosovën, Petar Petkoviq ka komentuar çështjen e Asociacionit dhe targave, si dy nga temat më të rëndësishme për serbët e Kosovës.
Duke folur për Blicin serb, Petkoviq ka thënë se ka 10 vjet që po presin formimin e Asociacionit, por se në Prishtinë “nuk duan dialog e nuk duan paqe”.
“Ne i kemi kryer të gjitha obligimet tona dhe tash e 10 vjet presim formimin e Asociacionit të Komunave Serbe. Kur sheh se çfarë po bën Prishtina në të vërtetë, e ke të qartë se nuk duan dialog, nuk duan paqe, nuk duan që ne të biem dakord për asgjë, por padyshim këmbëngulin vetëm për të shkaktuar ndonjë reagim të papërshtatshëm nga serbët me lëvizjet e tyre të njëanshme,”-është shprehur ai.
Më tej, duke thënë se Beogradi kërkon Asociacion bazuar në marrëveshjet e arritura në 2013 dhe 2015, Petkoviq ka shtuar se Kurti nuk do ta formojë Asociacionin ndërsa ka përmendur edhe kriteret e Bislimit, për të cilat thotë se as nuk janë diskutuar në takim.
“Kurti nuk do të formojë Asociacionin, nuk e do. Ata thonë çdo ditë se Asociacioni duhet të jetë në përputhje me Kushtetutën e Kosovës, se ai nuk duhet të ketë kompetenca ekzekutive. Bislimi tani përmend në publik nja pesë kritere, të cilat as që u diskutuan. Pra, Kurti nuk foli asnjë fjalë për ndonjë kriter. Kriteret u vendosën në marrëveshjet e vitit 2013 dhe 2015, si duhet të duket komuniteti, cilat janë kompetencat e tij, kompetencat thelbësore, cili është qëllimi i komunitetit, cila është struktura e tij, si do të funksionojë,”- ka thënë Petkoviq.
Tutje Petkoviq është pyetur edhe për çështjen e targave, ku ka thënë se ato janë kriza që janë krijuar nga Kurti.
“Kur flasim për targat, kemi pasur ato kriza që ka krijuar Kurti dhe më pas kemi pasur një marrëveshje më 30 shtator 2021. Në bazë të asaj marrëveshjeje, u ra dakord që të vendosen ngjitëse në të gjitha pllakat, përfshirë tabelat KM. Është një çështje e ndërlikuar. Pas kësaj, Kurti, në vend që ta respektojë, fillon sërish me vendime të reja të njëanshme,”- ka thënë Petkoviq.
