Lista Serbe ka reaguar për vendimin e bashkimit të Komunës Veriore të Mitrovicës në Asociacionin e Komunave të Kosovës.
Sipas tyre, ashtu sikurse të gjitha vendimet e deritanishme, vendimi për anëtarësimin në Asociacionin e Komunave të Kosovës, i cili është marrë nga shumica e kundërligjshme dhe jolegjitime parlamentare e Komunës së Severna Mitrovicës, është i pavlefshëm dhe askush nuk e konsideron atë relevant në mesin e qytetarëve të Komunës së Mitrovicës së Veriut.
“Sikur të gjitha vendimet gjer më tash, vendimi për anëtarësim në Asociacion të Komunave të Kosovës, që është marrë nga shumica e paligjshme dhe jolegjitime e asamblesë komunale në Mitrovicë të Veriut, është null, dhe askush nuk e konsideron relevant në mesin e qytetarëve të Mitrovicës së Veriut”, ka shkruar Lista Serbe.
Madje, Lista Serbe thotë se “përfaqëson vetëm qëllimin e regjimit të Albin Kurtit për përshkallëzim të situatës”.
“Sa i përket Asociacionit, qytetarët tanë janë të interesuar për Asociacionin e Komunave të banuara me shumicë serbe, si institucioni çati që do të mbrojë popuzllin serb…”, ka shkruar Lista Serbe.
Kuvendi Komunal i Mitrovicës së Veriut, ka votuar “pro”, bashkimit të kësaj Komune, në Asociacionin e Komunave të Kosovës.
Aida Doli, këshilltare komunale përmes një shkrimi në Facebook, e ka konfirmuar se u votua “pro” në Kuvend, duke e cilësuar vendim thelbësor për adresimin e sfidave.
“Sot, në Kuvendin Komunal, në Veriun e Mitrovicës, u votua pro bashkimit të Komunës Veriore të Mitrovicës në Asociacionin e Komunave të Kosovës. Kjo votë tregon përkushtimin dhe mbështetjen për bashkëpunimin e fortë dhe përforcimin e qeverisjes lokale. Bashkëpunimi dhe bashkërendimi i komunave janë thelbësore për të adresuar sfidat dhe për të ndërtuar një shoqëri më të bashkuar dhe më të qëndrueshme për të gjithë.”
