Vdekja e 26-vjeçarit në Ferizaj ka tronditur familjen Kashtanjeva. I riu vdiq tragjikisht pasi ra nga kati i tretë i banesës dhe fatkeqësisht nuk mundi t’iu bëjë ballë plagëve që mori.
Policia tashmë ka nisur hetimet për këtë rast që u cilësua si i dyshimtë, teksa trupi i pajetë u dërgua në IML.
Burimet brenda Emergjencës kanë bërë me dije se i riu që humbi jetën mbrëmë është Rinor Kashtanjeva, i cili dyshohet se e ra nga ballkoni pasi u mbështet në mbajtëset, të cilat nuk ishin të vendosura siç duhet dhe fatkeqësisht ranë.
Ekipi mjekësor i Emergjencës ka dalë menjëherë në vendin e ngjarjes ku kanë hasur në trupin e viktimës dhe pas kontrollit, mjeku ka konstatuar se ai ka ndërruar jetë.
Lidhur me rastin është njoftuar edhe Policia e Kosovës, të cilët kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.
Në kuadër të veprimeve hetimore janë marrë disa deklarata edhe nga dëshmitarët.
Me urdhër të Prokurorit të Shtetit, rasti është cilësuar ‘Vdekje e dyshimtë’ dhe trupi i pajetë i viktimës është dërguar në Institutin e Mjekësisë Ligjore për obduksion.
