Pas gjashtë muajsh prej kur ishte denoncuar një rast i vjedhjes së rëndë, që kishe ndodhur në Shupkovc të Mitrovicës, Policia ka arritur tash ta arrestojë personin e dyshuar që vodhi një automjet. I njëjti ndodhet në ndalim policor dhe ndaj tij tashmë është dorëzuar edhe kallëzimi penal.
Burimet brenda Prokurorisë kanë bërë me dije se bëhet fjalë për vjedhjen e një furgoni të kompanisë “Union” në Mitrovicë, që kishte ndodhur në muajin mars.
Mësohet se personi i arrestuar është Vladimir Nastiq, 33-vjeçar, që dyshohet se ka vjedhur automjetin e kësaj kompanie, që dyshohet se u dërgua më pas në Rashkë.
Pas arrestimit, i dyshuari është shoqëruar në stacion policor, ku është intervistuar nga hetuesit policorë.
Ndaj tij, Prokurori i Shtetit ka urdhëruar masën e ndalimit policor dhe ndërmarrjen e veprimeve të tjera hetimore brenda afatit ligjor.
