Presidenti i Serbisë, Aleksandër Vuçiç u shpreh sot se e gjithë bota, por edhe rajoni i Ballkanit po armatoset me shpejtësi, ndërsa theksoi se Serbia nuk do të mbetet prapa.
Gjatë një vizite në Shtëpinë Ruse në Beograd, me ambasadorin rus në Serbi, Aleksandar Bocan Kharchenko, Vuçiç shtoi se shumë shpejt do të shihet se si po armatoset Serbia.
“Të gjithë në rajon po armatosen. As ne nuk do të mbetemi prapa. Gjithçka që mund t’ju them është se ne nuk jemi prapa në këtë drejtim. Së shpejti do të mund ta shihni. Gjithashtu ndjek nga afër gjithçka që ndodh në të gjithë botën. Dhe në Amerikë, dhe në Angli, dhe në Francë, dhe në Gjermani. Ne po monitorojmë nga afër gjithçka kudo. Por ajo që nuk duhet ta ndiqni nga afër, ajo që shihni, edhe nëse nuk shihni asgjë dhe bëni sikur nuk dëgjoni asgjë, është se të gjithë po armatosen deri në dhëmbë”, tha Vuçiç.
Ndërsa i pyetur se si e kupton deklaratën e ministrit të Jashtëm britanik, David Cameron se Serbia është vegël e Rusisë, ai tha se Serbia është një vend sovran dhe i pavarur, jo përfaqësues i Rusisë, Britanisë, Amerikës, Gjermanisë apo kujtdo tjetër.
“Serbia është krenare për pavarësinë e saj. Prandaj jam i zhgënjyer nga deklarata e zotit Cameron dhe historia se do të jemi ne ata që do të kryejmë destabilizimin e rajonit, sepse më duket se të tjerët po e bëjnë me ndihmën e atyre faktorëve që na japin mësime çdo ditë. Është e qartë se ju shqetësoni shumë njerëz kur doni të keni politikën tuaj. Ne do të vazhdojmë të kemi politikën tonë të pavarur, edhe në çështjen e Federatës Ruse”, tha Vuçiç.
