Bota në alarm/ Kërkohet shmangia e udhëtimeve në Izrael dhe rajon: Biden jep detaje për një sulm të ashpër nga Irani!

Presidenti amerikan Joe Biden bëri një paralajmërim të prerë ndaj Iranit të premten, ndërsa bota po përgatitej që Irani të kundërpërgjigjej për sulmin vdekjeprurës ajror izraelit ndaj kompleksit të ambasadës iraniane në Damask.

Gjatë një bisede me gazetarët pas një fjalimi virtual të mbajtur për një aktivitet që zhvillohej në qytetin e Nju Jorkut, presidenti Biden paralajmëroi Iranin të mos ndërmarrë veprime dhe tha se “jemi të përkushtuar për mbrojtjen e Izraelit. Do ta mbështesim Izraelin. Do të ndihmojmë për mbrojtjen e Izraelit dhe Irani nuk do të ketë sukses”.

Komentet e presidentit Biden pasuan deklarata të ngjashme mbështetjeje nga zyrtarë të lartë amerikanë të mbrojtjes dhe të diplomacisë gjatë ditëve të fundit dhe ndërsa ushtria amerikane po merr masa për t’u siguruar se rritja e tensioneve mes Izraelit dhe Iranit nuk do ta përfshijë Lindjen e Mesme në një luftë më të zgjeruar.

“Po dërgojmë njësi të tjera në rajon për të forcuar përpjekjet parandaluese dhe për të rritur mbrojtjen për forcat amerikane”, i tha të premten një zyrtar i mbrojtjes Zërit të Amerikës.

Zyrtari, i cili kërkoi t’i ruhet anonimiteti, nuk dha detaje të mëtejshme.

Dhe ndërsa zyrtarët amerikanë e paralajmëruan Iranin të mos hakmerret, një organizatë e rëndësishme që mbështetet nga Irani u hodh në veprim.

Organizata Hezbollah nga Libani nisi dhjetëra raketa ndaj Izraelit verior.

Forcat Mbrojtëse të Izraelit thanë se pikasën rreth 40 raketa që kalonin nga Libani drejt Izraelit, një pjesë e të cilave u interceptuan nga sistemet e mbrojtjes kundërajrore.

Ushtria izraelite tha se kishte arritur të interceptojë edhe dy dronë me eksploziv që militantët e Hezbollahut përdorën për të sulmuar Izraelin më herët të premten.

Nuk është e qartë nëse sulmet me raketa dhe dronë nga Hezbollahu ishin pjesë e përpjekjeve nga Irani për t’iu kundërpërgjigjur sulmit ajror izraelit ndaj kompleksit diplomatik iranian këtë muaj, kur u vranë tre komandantë të lartë të Gardës Revolucionare të Iranit, përfshirë gjeneralin Ali Reza Zahdi, i cili drejtonte forcat elitë iraniane Quds.

Udhëheqësi suprem i Iranit, Ajatollah Ali Khamenei, paralajmëroi të mërkurën se Izraeli “duhet të ndëshkohet dhe do të ndëshkohet” për sulmin e 1 prillit, pak ditë pasi një nga këshilltarët e tij tha se ambasadat izraelite “nuk janë më të sigurta”.

Diplomatët amerikanë, përfshirë sekretarin e Shtetit Antony Blinken, kanë kontaktuar homologët në Turqi, Kinë dhe Arabinë Saudite, duke u kërkuar që t’ia bëjnë të qartë Teheranit se “përshkallëzimi nuk është në interesin e askujt”, u tha gazetarëve të enjten zëdhënësi i Departamentit të Shtetit, Matthew Miller.

Por, përpjekjet amerikane për uljen e tensioneve janë shoqëruar me shprehjen e mbështetjes së fortë për Izraelin, ndaj një agresioni të mundshëm nga Irani.

“Jemi në komunikim të vazhdueshëm me homologët izraelitë për t’u siguruar se mund të vetëmbrohemi”, u tha gazetarëve më herët të premten zëdhënësi i Këshillit të Sigurisë Kombëtare, John Kirby, duke e përshkruar si shumë të besueshëm kërcënimin nga Irani për t’u kundërpërgjigjur.

“E marrim shumë seriozisht angazhimin tonë për ta ndihmuar Izraelin për t’u mbrojtur”, vuri në dukje zoti Kirby. “Është një angazhim i hekurt”.

Gjatë një telefonate të enjten me ministrin izraelit të Mbrojtjes, Yoav Gallant, sekretari amerikan i Mbrojtjes, Lloyd Austin ofroi gjithashtu mbështetjen e Uashingtonit për Izraelin.

“Sekretari Austin e siguroi ministrin Gallant se Izraeli mundet të mbështetet plotësisht tek ndihma amerikane kundër sulmeve iraniane”, thuhet në një njoftim të Pentagonit.

Deklaratat amerikane dhe zhvendosja e njësive ushtarake për të dekurajuar një agresion nga Irani, nuk kanë arritur megjithatë t’u japin përgjigje shqetësimeve në rritje.

“Jemi shumë të shqetësuar për një përshkallëzim të mundshëm në një situatë që duket se përshkallëzohet çdo ditë”, tha zëdhënësi i OKB-së, Stephane Dujarric.

“Mesazhi ynë, që është dërguar privatisht dhe publikisht, është që të shmanget përshkallëzimi dhe të punohet për një ulje të tensioneve”, u tha zoti Dujarric gazetarëve të premten./VOA

Ministria e Punëve të Jashtme e Maqedonisë së Veriut u bënë thirrje qytetarëve që të shmangin udhëtimet për në vendet Izrael, Iran, Liban dhe territoret palestineze.

“Si rrjedhojë e informacioneve për përkeqësim të mundshëm të situatës së sigurisë në Izrael dhe rajon, Ministria e Punëve të Jashtme iu apelon qytetarëve të Republikës së Maqedonisë së Veriut që të shmangin udhëtimet që nuk janë të domosdoshme në Izrael, Iran, Liban dhe territoret palestineze.

Me këtë rast, rikujtojmë linjën telefonike të Ambasadës së Maqedonisë së Veriut në Tel Aviv + 972 549 267 378 (email adresën [email protected] ).

Si dhe linjat telefonike të Ministrisë së Punëve të Jashtme +389 75 273 732. / +389 268 736 (email adresa [email protected] )”, njoftojnë nga MPB.

Kandidati për president i Maqedonisë së Veriut, Bujar Osmani sot theksoi se ka marrë informacione se lufta në lindjen e Mesme mund të zgjerohej dhe se bota është para një lufte të tretë botërore.

“Para tre minutave nxora një kumtesë si MPJ dhe paralajmërova njerëzit se në 48 orët e ardhshme mund të ndodhë një konflikt shumë i madh në Lindjen e Mesme dhe u rekomandova të gjithë njerëzve tanë se nëse janë në Lindjen e Mesme diku afër Iranit dhe Izraelit ta lëshojnë menjëherë atë zonë, për shkak se paralajmërimet nga NATO janë se pritet një konflikt i gjerë atje”, paralajmëroi Osmani.

Osmani tha se një konflikt i mundshëm në Lindjen e Mesme së bashku me agresionin rus në Ukrainë, do të thotë se asnjëherë s’kemi qenë më afër të Luftës së Tretë Botërore.

Osmani shtoi se armët bërthamore janë bërë temat kryesore dhe, siç thotë ai, këtë nuk e thotë për të trembur njerëzit por për të informuar ato.

Presidenti i SHBA Joe Biden pret që një sulm nga Irani do të ndodhë shumë shpejt u tha ai gazetarëve në Shtëpinë e Bardhë të premten.

“Unë nuk dua të marr informacione të sigurta, por pritshmëria ime është më shpejt se më vonë,” tha Biden kur u pyet se sa i afërt ishte një sulm ndaj Izraelit, shkruan CNN, përcjell “Bota sot”.

I pyetur se cili është mesazhi i tij për Teheranin tani, presidenti tha "Mos".

Në përgjigje të pyetjeve më të bërtitura nga gazetarët që pyesnin nëse trupat amerikane ishin në rrezik, Biden u kthye në podium dhe tha se Shtetet e Bashkuara janë "të përkushtuara" për mbrojtjen e Izraelit.

“Ne do të mbështesim Izraelin. Ne do të ndihmojmë në mbrojtjen e Izraelit dhe Irani nuk do të ketë sukses”, tha Biden.

Shtetet e Bashkuara thonë se janë në gatishmëri të lartë për një sulm të rëndësishëm hakmarrës iranian pas sulmit vdekjeprurës të Izraelit në konsullatën e Teheranit në Damask javën e kaluar, duke rritur frikën për një luftë më të gjerë rajonale. Mbetet një kërcënim "i vërtetë", "i besueshëm" dhe "i zbatueshëm" i Iranit që të nisë sulme, tha Shtëpia e Bardhë më herët të premten, pas sulmit të Izraelit në një kompleks diplomatik në Siri që vrau tre gjeneralë iranianë.