Jetulla Qerimi, vëllai i Rexhailit tashmë të ndjerë, në një intervistë, ka deklaruar se qëllimi i protestës së paralajmëruar për ditën e premte është kërkimi i drejtësisë deri në fund.
Ai ka theksuar e kanë borxh dhe amanet që drejtësinë e tij ta çojnë në vendin e duhur.
“Është e vërtetë se Rexhaili ndërroi jetë duke pritur drejtësi në gjykatat e Republikës së Maqedonisë së Veriut, por ne si familje kemi vendosur ta kërkojmë deri në fund. E kemi borxh dhe amanet që drejtësinë e tij ta cojmë në vendin e duhur. Kjo është arsyeja që do të organizojmë protestë ditën e premte”, deklaroi Jetulla Qerimi.
Protesta do të mbahet ditën e premte me fillim prej orës 13:30 minuta nga Sheshi Skënderbeu në Çair të Shkupit dhe pastaj do të marshohet deri te zyret e Bashkimit Europian.
Atje do t’i japim dokumentet e rasteve të montuara dhe do të kërkojmë që BE të marrë masa për këto padrejtësi që iu bëhen shqiptarëve në Maqedoninë e Veriut.
Qerimi tha se në protestë pret t’i bashkohen të gjitha organizatat joqeveritare, popullata dhe të gjithë ata që janë të prekur për rastin, që është i montuar, politik. Ai beson se do të kenë mbështetje të madhe dhe do të vazhdojnë deri në fund të zbardhjes së rastit.
Për në fund, Jetulla Qerimi i falënderoj pjesëmarrësit e shumtë nga të gjitha trojet shqiptare që morën pjesë në varrimin e Rexhail Qerimit dhe të gjithë ata që iu shprehën ngushëllime në shtëpinë e tyre.
Rexhail Qerimi ndërroi jetë të enjtën e kaluar në burgun e Idrizovës, ku sipas disa informacioneve jozyrtare, kishte pësuar sulm në tru. Ai ishte i dënuar me burg të përjetshëm për rastin “Alfa”.
