“Të gjithë e dimë se si funksionojnë buxhetet, të gjithë e dimë se në çfarë lëvizjesh ekonomike jemi, që vijnë nga jashtë. Mund të ketë mësim dhe të gjendet mënyrë tjetër për të treguar revoltën”.
Këtë e tha Jeton Shaqiri, ministër i Arsimit dhe Shkencës në “TV24”, në lidhje me grevën në arsim, e cila ka filluar të hënën.
“Deri tani kemi 4 ditë jo pune, kemi humbur materialet mësimore që duhet kompensuar, ne këtë grevë të përgjithshme e kemi quajtur që të jetë hapi i fundit sepse tani jemi me konkurs regjistrimi për shkollat e mesme. E pyeta SASHK-un se si do të kompensohen orët, e drejta kushtetuese e fëmijëve është të kenë mësime. Në takimin e parë qëllimi i përbashkët, nuk kemi thënë asnjë fjalë që nuk mendojmë se do të ketë rritje rroge. Qëndrimi ynë është se ky proces arsimor është shumë i rëndësishëm”, shtoi ai.
Ai theksoi se kur hyhet në proces për zgjidhjen e problemit, nuk ka arsye për revoltë.
“Çështja është nëse problemi do të zgjidhet për 3, për 5 ditë. Pse duhet që fëmijët të jenë garantues i këtij procesi”, tha Shaqiri.
Ndryshe, Sindikata e Arsimit, Shkencës dhe Kulturës (SASHK) të hënë ka nisur grevë, me çka kërkon rritje të pagave për punonjësit në arsim.
