Propozimi francez parasheh që gjuha maqedonase të mbrohet tani dhe përgjithmonë. Gjuha maqedonase do të bëhet gjuhë zyrtare e BE-së, theksoi në konferencën e sotme për media, Arbër Ademi, koordinator i Grupit Parlamentar të Bashkimit Demokratik për Integrim, pas koordinimit kushtuar Informimit për kornizën e propozim-negociatave.
“Si lajm i rremë thonë se nuk do të fillojmë, nuk do të fillojmë me negociata. Si në kuadrin e negociatave, ashtu edhe në të gjitha dokumentet, si dhe në deklaratat e të gjithë miqve tanë nga bashkësia ndërkombëtare, nga vendet demokratike, thuhet se do të fillojmë menjëherë negociatat. Dhe tani kujt duhet t’i besojmë? Lajmet e rreme apo përfaqësuesit e institucioneve tona dhe miqve tanë ndërkombëtarë me të cilët krah për krah kemi arritur të gjitha sukseset e këtij vendi”, tha Ademi.
Ai thekson se protokolli me Bullgarinë, kur të finalizohet, do të nënshkruhet dhe do të shpërndahet me të gjithë opinionin në kohën e duhur.
“Pse duhet që unë si deputet të kem qasje në këto dokumente? Çdo qytetar duhet të ketë qasje në këto dokumente. Dhe ka qasje në këto dokumente. Mendoj se kurrë më parë nuk ka pasur një mënyrë kaq transparente. Dhe ne duhet të vazhdojmë kështu, sepse vetëm kështu mund ta fitojmë betejën me lajmet e rreme, të cilat na janë përshtatur në qendrat që nuk ia dëshirojnë të mirën Maqedonisë së Veriut dhe shoqërisë sonë. Meqenëse dokumentet tashmë janë publikuar, i gjithë publiku ka qasje në to, kjo mund të bëhet menjëherë. Ato mund të përcillen menjëherë në Kuvend si material historik”, tha koordinatori i BDI-së.
